Dünən Çinarə Ömrayın sayəsində tanış olduğum və çox sevdiyim Orxan Adıgözəl ilə görüşdüm. Müxtəlif mövzularda müzakirələr aparırdıq. Vaxtın necə keçdiyini belə hiss etmirdik. Müzakirə etdiyimiz mövzulardan biri də fahişələr, fahişəlik və fahişəliyin rəsmiləşdirilməsi, qanuniləşdirilməsi idi.
Orxan həm də mənim “Cəsarət və həqiqət”in hədəfində layihəmin qonağı oldu. Çox səmimi və cəsarətli cavablar verdi. Təşəkkür edirəm.
Fahişəlik nədir və kimlərdir?
Fahişə ərəb sözü olub, fuhuşə, “son dərəcə alçaq, prinsipsiz, satqın, özünü-əqidə, ruhunu satan adam, azğın , utanmaz , həddini aşan” deməkdir. Yəni əslində, bədənini deyil, özünü, ruhunu, əqidəsini, insanlığını satan insanlardır.
Fahişəliyin qanuniləşdirilməsini istəyirəm. Səbəbləri çoxdur.
Bu yazıma görə məni söyən, təhqir edən, qınayan çox olacaq. Olsun. Əsas mən öz fikirlərimi və doğru bildiklərimi yazacağam.
Fahişələr də insandırlar. Hərçənd onları çox adam sevmir, aşağılayır, söyür. təhqir edirlər. Onlar da qadındırlar.
Onları həyat və insanlar fahişə edir. Fahişəlik könüllü və ya məcburi seçimdir.
Önyarğılı olmamaq lazımdır.
Bəlkə bədənlərini satsalar da, bir qisminin ruhu bakirə qalır.
Onlar daha mehriban, səmimi, ünsiyyətcil, güclü, mərd, ürəyiyumşaq, əliaçıq, anlayışlı dost olurlar. Bəlkə ona görə ki, həyatın da, insanların da hər üzünü görüb, yaxşı tanıyır və seçməyi bacarırlar deyə…
Anam əxlaq baxımından çox mühafizəkar idi, qalan çox məsələdə liberal olsa da. Həmişə fahişələri qınayardı. Deyərdi ki, “bilsəm ki, sən əxlaqsız nəsə etmisən, özüm səni öldürərəm”.
Mən bir günə qədər fahişələrə pis yanaşır, onları anlamırdım, qınayırdım. Amma deyirlər ha, adamın başına gəlməyincə, digər insanı anlamaz.
Bir gün, məhz o gün mən qınamağın daşını atdım. Empatik olmağı öyrəndim.
Fahişələrin çoxusu keyfindən fahişəliklə məşğul olmur. Çoxusunun ya təhsili olmur, ya işə götürülmür, ya ailəsini saxlamalıdır, ya övladını saxlamalıdır, ya ailəsində xəstə kimsə var, onun müalicəsinin xərcləri onun üzərindədir, ya ailəsi onu kiməsə satmışdır, ya qaçırılmışdır, ya zorlanmışdır və s. Fahişəliyə cəlb edilən qadınların çoxusunun səbəbi maddi problemlər, digər qadınlar və onları fahişə edən kişilərdir.
Əslində, əsl insan, kişi “fahişəni məleykə edən insandır, məleykəni fahişə edən yox”
Həyatda 3 dəfə çox pis yıxıldım, həyat tərəfdən vurulsam da, həyatımı qınamadım, nə də insanları qınadım. İşsiz qaldım. Birinci dəfə 9 ay işsiz qalanda valideynlərimlə qaldığımdan, evdə işsiz və bekar qalmaqdan bezirdim, psixoloji təsir və əsəb var idi. Maddi sıxıntı keçirmirdim.
İkinci dəfə Tacikistandan 2012-ci ildə qayıdanda düz altı ay, qucağımda yaşyarımlıq körpəm, işsiz idim, öz evim yox idi, öncə kirayədə qaldım, dərdimi atam daşıyırdı. 2 ay bibimgildə qaldım. İş axtarsam da, tapmırdım. Kirayə qalanda, iş axtarsam da, yenə tapa bilmirdim. Mənim kimi savadlı, ağıllı, ali təhsilli və iş təcrübəsi olan insan iş tapa bilmirdi. İyuldan düz növbəti ilin fevralınadək işsiz qaldım. Övladım, kirayə haqqı, işsiz ər, atamın bizim xərclərimizi ödəməsi və yükümüzü daşıması məni ən sərt qərarlar və qeyri-adekvat düşünməyə vadar edirdi. Üstünə də 5000 dollardan yuxarı məbləğdə borc yığılmışdı. İş tapa bilməyəndə, necəsə pul qazanmalı idim, ailəmin yükünü atamın üzərinə ata bilməzdim. Yalan niyə deyim ki, ən son seçim kimi düşünürdüm ki, ərimdən boşanım, zatən bir xeyri yoxdur, qızımı bağçaya qoyub, iş axtaracağam. Alınmazsa. yola çıxıb fahişəliklə məşğul olmağı belə düşünürdüm.
Məni sxalayan amil hər kəsin hörmət etdiyi atamın mənə hörmət etməsi, anlaması, dəstək olması, mənlə fəxr etməsi idi. Onun üzünü qara edə bilməzdim, dözməli, mübarizə aparıb iş tapmalı idim. Həyat yoldaşım evdə ya televizora baxırdı, ya internet üzərindən dostları ilə yazışırdı. Dərdi tək mən çəkirdim. Hələ üstəlik məni qızımla evdən çıxarırdı ki, get, qızınla gəzin. O ərəfədə mənə bir çox kişilər təklif edirdi ki, ərimdən boşanım, onlar məni saxlasın. Onu belə düşünürdüm. Bir gün qızımla parkda gəzinəndə, mobil telefonuma zəng gəldi. Həmin kişilərdən biri idi, dəfələrlər təklifini rədd etsəm də, yenidən inad edir, təklifində israrlı idi. Çıxılmaz vəziyyətdə idim, uzun çəkən pauzadan sonra əlacsızlıqdan razı olmağı düşünürdüm ki, qızım arxadan qaçaraq mənim ayaqlarımı qucaqladı, aşağıdan yuxarı sevgi dolu təbəssümlə baxıb, qollarını açdı ki, onu qucağıma alım. Kövrəldim, yumşaldım. Qız anasıyam, buna razı ola bilməzdim. Həmin kişini söyüb təhqir etdim. Həmin insan bir daha mənə zəng etmədi.
Sonra ərimlə ayrılanda 2014-cü ildə bankdan çıxıb 3 ay işsiz qaldım. Bankdakı rəhbərliyin sayəsində iş tapa bilmirdim. Düzdü, cəzalarını alıblar. O il düz 3 ay işsiz qaldım, atam Gürcüstanda əməliyyatda idi. Həyat yoldaşım qızımla Tacikistana köçmüşdü. Tək, işsiz idim, içməyə başladım. Necəsə pul qazanmalı idim. Evimin yanındakı parklarda gəzib, gələn-gedən bahalı maşınlara baxırdım. Çox pis idim. Hər parkda gəzinəndə, zamanından asılı olmayaraq mənə görə hökmən kimsə maşınını saxlayırdı. Ayrıldığımı bilən kişilər yenə milçəklər bala yığışan kimi bezdirirdilər, qərəzsiz və alt niyyətsiz maddi dəstək təklif edirdilər. İnanmırdım onlara…
Bir gün içimdən bir istək keçdi, maşınların birinə oturub getmək. Çünki 2 aylıq ev pulunu verməli idim. Evdən çölə atılacaqdım. Oktyabr ayı idi. Ağlayırdım, içirdim, içirdim, ağlayırdım. Qızım və atam gözümün önünə gəlirdi. Onların üzünə necə baxacağam deyə. Birdən zəng gəldi. keçmiş ərim idi, hal – əhvalımı tuturdu, ağladığımı və küçədə olduğumu anladı. Səbəbini soruşanda, dözməyib dedim, Səhərisi gün mənə 200 dollar məbləğində pul göndərdi. Manata çevirəndə evin 1 aylıq pulunu ödəyə bildim. Sonra atam gəldi, sonra işə düzəldim.
Bu iki hadisədən sonra anladım ki, insan bu addımı atmaq üçün tutarlı çətinlik və problemləri var. Qınamayacağam. Yazıma görə fahişələrlə danışanda, onların həyat hekayələrini ağlayaraq dinləyəndə, bir daha anladım ki, mənim 2 dəfə bəxtim gətirib, arxamda adam oldu, dəstək oldu, onların isə bu dəstəkləri, adamları olmur. Onlar məcburiyyətdən bunu edirlər.
Fahişəliyi təbliğ etmirəm, amma onları qınamıram da…
Fahişəlik qanuniləşərsə:
- Bu qanunsuz bir fəaliyyət, cinayət olmaz. Kimsə bu işə məcburi cəlb edilə bilməz, nəzarət altında olar.
- Bunun üçün xüsusi fahişəxanalar olar, icarə müqaviləsi bağlanar, fahişələrlə əmək müqaviləsi bağlanar, onlar hamı kimi gəlir vergisi ödəyər, pensiya almaq hüququna malik ola bilər.
- Cinsi yolla keçən xəstəliklərin yayılmasının qarşısı alınar. Çünki onlar həkim nəzarəti altında olar, hər ay tibbi müayinədən keçər, xəsətlik olduğu halda, müalicə edilər, başqasını yoluxdurmaz, abort halları, küçəyə atılan uşaqların sayı azalar.
- Fahişələrin kimliyi bəlli olar, gizlənməzlər.
- İnsan kimi hüquqları qorunar, aqressiya, şiddət qurbanı olmazlar.
- Kölgə biznesindən gələn qeyri-qanuni gəlirlər qanuniləşər.
- Zorlanma, insest, pedofiliya hallarının sayı azalar.
- Fahişəliklə məşğul olacaq şəxslərin 18 yaşdan yuxarı olması tələbi azyaşlıların bu biznesə cəlb edilməsi hallarının sayı azalar.
- Bu sahədə biznes etikasına əməl edilər.
- Fahişəlik biznesi ilə bağlı açıq reklam və ya təbliğat hallarının qarşısı alınar, fahişələr küçələrə düşməz, həyatları təhlükə altında olmaz.
- Qanunu pozan şəxslərin cərimələnməsi üçün cərimə mənbəyinin yüksək olmasını təmin etməkdir.
- Bütün fahişələri rəsmən qeydiyyata alınar.
- Fahişər arasında narkotikadan istifadənin qarşısı alınar.
- Fahişələrin ölkədən kənara çıxılmasına məhdudiyyətlər qoyular.
- Müştərilərin xəstəliyə yoluxdurulmasına görə məsuliyyətə cəlb edilər və cərimələnər.
- Fahişələr tərəfindən oğurluq hallarının qarşısı alınar.
- Müştərilərin şantaj olunması halları azalar.
- Fahişəxanaların planlı və plandankənar yoxlanması təşkil edilər.
- Vegidən yayınma halları azalar.
- Fahişəxanaların və fahişələrin vergilərdə və polisdə hökmən qeydiyyata düşməsi təmin edilər.
- Vergi hesabına bələdiyyə büdcəsinin gəlirləri artar.
- Bu sahədə cinayətkarlıq halları azalar.
- Xidmətin keyfiyyəti artar.
- Bu biznes iştirakçıları, eləcə də müştərilərin hüquqları qanunla qorunar. 18 yaşına çatmayan insanların intim xidmətdən istifadə edilməsi hallarının qarşısı alınar.
Комментарии